"Opið bréf til forsætisráðherra."

Sælt veri fólkið. Mér fallast orðið hendur yfir "trygglyndi" forsætisráðherra við flokksbræður sína. Er þetta ekki þrjóska af verstu sort, þegar menn sturta niður pólitíska ferli sínum frekar en að hlusta á kröfur þjóðar sinnar? Geir hefur alla tíð verið þekktur sem öðlingur og ljúfmenni og sérlega traustur. Hollusta við þá sem næst okkur standa er af hinu góða, en ef t.d. börn okkar sína óviðunandi framkomu eða getuleysi við framkvæmd mála, reynum við að koma þeim á rétta braut. Ef það dugar ekki, verðum við að sína ákveðni og jafnvel slá á puttana á þeim og taka fram fyrir hendurnar á þeim. Geir, ef ekki er tími til kominn að losa þig við FARÞEGANA í kringum þig, sem jafnvel ætla sér að ráða ferðinni, hvenær þá? Þú hefur nú þegar beðið stórskaða af hollustu þinni við þá sem ekki eiga það skilið. Það sjá allir hvaða viðvaningar eru til staðar, sem sýna ekki sóma sinn í að segja af sér sjálfviljugir. Þeir hafa stillt þér upp við vegg svo nú verður þú að taka af skarið og afgreiða þetta sjálfur. Þeir eru greinilega ekki traustsins verðir. Sæl að sinni.

Rotið réttarkerfi!

Sælt veri fólkið. Enn og aftur fáum við sannanir fyrir því að ekki eru allir jafnir fyrir lögunum. Lögregla fer fram á gæsluvarðhald yfir forstöðumanni verðbréfafyrirtækis en dómari hafnar þeirri beiðni! Milljóna auðgunarbrot hefur átt sér stað en greinilega er kippt í spotta úr einhverri rottuholunni. Það sést vel á þessu að skipulega hefur tekist að raða "vinum" inn í réttarkerfið. Hverja skyldi hann umgangast? Ef um "venjulegann" mann væri að ræða, hvar væri hann þá? Lokaður inni að sjálfsögðu. Nú skulum við fylgjast vel með, hverjir verða lokaðir inni og hverjir ekki. Bónusflaggarinn var sóttur inn á Alþingi vegna eldri mótmæla, en þessi maður gengur um og hlær framan í lögregluna. Eigum við að bera virðingu fyrir réttarkerfinu? Spyr sá sem kominn er með upp í kok vegna rotins kerfis. Sæl að sinni.

Nýtt framboð!

Sælt veri fólkið. Mér sýnist á öllu að nú sé tími kominn á að þjóðin sameinist um nýtt framboð. Það mun aldrei gróa um heilt á meðan þessar klíkur, sem lagt hafa undir sig stjórnkerfið, ráða ferðinni. ALLIR virðast vera undir sama hattinn settir, standa vörð um eigin hagsmuni. Það eina sem virðist vera í stöðunni er að fá FAGMENN á öllum sviðum þjóðfélagsins til að taka sæti á nýjum lista. ALGJÖRT skilyrði væri, að viðkomandi hefði ekki verið virkur í stjórnmálaflokki eða INNVÍGÐUR skuggabaldur í framapoti. Ef þjóðinni stæði til boða þetta val, trúi ég því að fólk myndi flykkjast til liðs við hið nýja framboð. Aðeins þeir heilaþvegnu myndu hanga og falla með gömlu klíkuflokkunum. Völdunum munu þeir aldrei sleppa nema með hörðu. Aðalstefnumál hins nýja framboðs yrði að Hreinsa allar rotturnar út úr holunum og koma á opnum og fagmannlegum vinnubrögðum í ríkisbákninu. Freistandi, ekki satt? Sæl að sinni.

Milljarðaþjófnaður!

Sælt veri fólkið. Hvernig stendur á því, að fólk er ekki endanlega búið að sleppa sér í reiði vegna frétta af milljarða þjófnaði út úr Glitni? Topparnir þar "lánuðu" tug milljarða, ÁN ÁBYRGÐAR, til fyrirtækis í Bolungarvík sem enginn vissi af fyrr en nú. Það er svo greinilegt að stráklingurinn, sem skráður var fyrir þessu fyrirtæki, var notaður sem leppur við risa þjófnað út úr bankanum. Ég er orðlaus yfir aðgerðarleysi saksóknara ríkisins og lögregluembættisins. Ef um einhver smásíli væri að ræða, sætu viðkomandi inni á meðan rannsókn stæði yfir. Nú er að koma í ljós hvert fjármagnið úr sjóðum bankans fór. Þegar þessir glæpamenn eru beðnir um skýringar, bera þeir við bankaleynd eða að fólki komi þetta ekki við. Ósvífnin er slík að það sýður hreinlega á manni. Núna sitja þessir hundar og moka yfir slóð sína á meðan saksóknari, lögreglustjóri og já dómsmálaráðherra klóra sér í rassgatinu aðgerðarlausir. Það er ekki búið að frysta eigur þeirra, þeir búa í höllum sínum og keyra lúxus kerrur sínar ennþá. Þeir sína hroka og fyrirlitningu í aðgerðum sínum vegna þess að þeir virðast vera undir verndarvæng yfirvalda. Þeir telja sig vera stikkfrí. Kreppan nær ekki til þeirra því nú geta þeir fitnað af þýfinu sem þeir hafa komið undan. Ef yfirvöld taka ekki á þessum málum öllum ,verðum við almenningur að gera það sjálf. Nú tel ég að það styttist verulega í að þessir ræflar flýi land vegna uppljóstrana DV. um þetta mál. Þá látum við yfirvöld bera ábyrgðina á glæpnum. Ég hvet nú DV til dáða í þessum málum og dragi þeir hvergi undan í rannsóknarblaðamennsku sinni. Hristið ærlega upp í þessu drullusvaði, því þar leynast örugglega ótrúlegustu nöfn undir steini. Látið höfuðin hiklaust fjúka. Sæl að sinni.

Peningaþvætti?

Sælt veri fólkið. Ég er farinn að trúa því sem Danir sögðu um okkur, að hér hefði örugglega stórfellt peningaþvætti farið fram í bönkum landsins. Undanfarin ár hef ég ítrekað heyrt frásögur fólks af skrítnum peningafærslum á bankareikningum þeirra. Þar höfðu bírst upphæðir sem eigendur könnuðust ekkert við en höfðu svo horfið þegar spurst var fyrir um þær. Alltaf voru sömu svörin viðhöfð, ÚPPS ÞETTA VORU MISTÖK. En það keyrði nú um þverbak, þegar kona sem á lítið gjafavörufyrirtæki og stóð þar af leiðandi í innflutningi, fór inn á reikning sinn og uppgötvaði sér til undrunar, að hún var orðinn milljarðamæringur. Allt í einu átti hún MILLJARÐ! Þetta var eftir lokun, svo hún varð að bíða til næsta dags eftir upplýsingum. Morguninn eftir var þessi milljarður horfinn og hvaða svör fékk hún? Jú jú, ÚPPS MISTÖK! Mistök my ass. Hver klúðrar milljarði inná rangan reikning? Ég spyr, er virkilega hægt að fara inná hvaða reikning sem er og nota hann til glæpastarfsemi? Þetta þýðir bara eitt. Starfsmenn bankanna hafa allar þær upplýsingar sem þeir þurfa á að halda. Þar liggur hundurinn grafinn. Eru fleiri sem hafa upplýsingar um svona bankafærslur? Gaman væri að heyra frá þeim. Sæl að sinni.

"SORGLEGT"

Sælt veri fólkið. Alveg er það sorglegt að horfa upp á Geir og Árna Matt. herða hengingarólina um hálsa sína í hvert sinn sem þeir opna munninn. Það er aumkunarvert að hlusta á þá halda því fram að ekki væri um innherja vitneskju félaga þeirra að ræða, er hann losaði sig við bréfin í Landsbankanum rétt fyrir hrun. Það er ennþá verra að hlusta á þá segja okkur að ábyrgðin sé ekki þeirra. Trúa þeir því raunverulega að þetta "óþægindamál" sem heitir kreppa, líði bara framhjá og gleymist í hugum landsmanna? Halda þeir virkilega að þjóðin muni bara fyrirgefa þeim og kjósa þá áfram til starfa? Segið af ykkur straks. Framlengið ekki dauðateygjurnar á pólitíska frama ykkar lengur. Sýnið manndóm og hreinsið sjálfir út úr greninu. Á maður að trúa því að Ingibjörg ætli að sökkva með dallinum? Ég er farinn að halda það, svei mér þá. Sæl að sinni. 

"Þjóðarsátt"

Sælt veri fólkið. Finnst ykkur ekki drepfyndið þegar það fréttist að verkalýðs leiðtogar og atvinnurekendur sitji pungsveittir við að setja saman nýja "ÞJÓÐARSÁTT". Halda þessir vitleysingar að fólk ætli sér einu sinni enn að fórna réttindum sínum, til þess eins að horfa á Kjararáð ausa áfram peningum í hátekju skrílinn. Þeir geta troðið þessari "SÁTT" upp í rassgatið á sér mín vegna. Það er ekki til umræðu að beygja sig enn einu sinni  fyrir hástéttinni. Við höfum horft á þetta lið vera stikkfrí, á meðan aðrir hafa fórnað. Þeim dettur ekki í hug að fórna 1 krónu af sínum hátekjum. Þau ætla sér að láta eftirlaunafrumvarpið daga uppi í nefnd í þinginu. Enn og aftur á ALMENNINGUR að borga brúsann. Ég segi þvert NEI, ég borga ekki rassgat. Sæl að sinni.

"Verkalýðsforingjar"

Sælt veri fólkið. Ég hef undanfarið verið að hlusta á verkalýðsforingja landsins koma fram og ræða ástandið í landinu. Önnur eins prumphænsni hef ég ekki augum litið, að undanskildum "leiðtogum" þessa lands. Hvað í andskotanum hefur gerst innan þessa félaga? Á ég að trúa því að þar finnist hvergi menn með bein í nefinu lengur? Það er eins og að horfa á klónaða stjórnmálamenn þegar þeir birtast. Ég skil mæta vel afhverju fólki fer fjölgandi á Austurvelli hverja helgi. Þegar þessir herrar mæta til að tjá sig, hafa þeir ekki einu sinni dug í sér til að hvetja sitt fólk til dáða, heldur hljóma þeir eins og strengjabrúður stjórnarherrana. Þeir eru gengnir í lið með atvinnurekendum og ætlast enn einu sinni til að fólk láti taka sig í rassgatið ósmurt. Almenningur gefur greinilega skít í þessa blessuðu forystumenn sína, því þeir sjást hvergi nærri mótmælum. Það er greinilega að myndast öflug hreyfing hins almenna borgara í landinu, hreyfing sem vill hreinsa út úr greninu. Ég sendi öllum baráttukveðjur og vona að mótmælin fari ekki úr böndunum vegna nokkurra Jókera með fána. Fyndið samt. Sæl að sinni. 

VISA þjófar.

Sælt veri fólkið. Mig langar aðeins að ræða hér starfsaðferðir kreditkorta fyrirtækisins VISA. Þannig er að ég og betri helmingurinn höfum undanfarin 8 ár verið að greiða í lífeyris og líftryggingasjóð Axa Sun Life. Hefur upphæðin verið þetta í kringum 13000 kr. á mánuði. Á sinum tima var okkur sagt að best væri að greiða þessa upphæð í gegnum VISA reikning. Gott og vel, þetta hefur gengið vel í þennan tíma en nú eru horfur á því að þetta glæpa fyrirtæki, þ.e.a.s. VISA, sé að leggja áframhaldandi veru okkar í sjóðnum í rúst. Við gerðum samning við Sun Life til 20 ára og ef við létum innistæðuna óhreyfða í minnst 10 ár, gætum við tekið út af sjóðnum án þess að bera skaða af (vexti og kostnað) Opinbert gengi pundsins í dag er 202 kr. og reiknuðum við með hækkunum sem því næmi. En það var nú öðru nær. Okkur berst allt í einu yfirlit um að VISA þjófarnir hefðu tekið 25000 rúmar fyrir síðustu greiðslu. Kemur þar fram að þau selji okkur pundið á 291 krónu!!!! ER ÞETTA HYSKI EKKI MEÐ ÖLLUM MJALLA? Var ekki talað um samstöðu og hófsemi í svona málum. ÞETTA ER SAMA VERÐ OG GRÓÐAPUNGARNIR Á NETINU ERU AÐ REYNA AÐ SELJA PUNDIÐ Á. Hver veitir þeim heimild til að okra svona miskunnarlaust á fólki? Þetta þýðir aðeins eitt fyrir okkur. Við neyðumst til að hætta þáttöku í sjóðnum. Með þessari framkomu hafa þau rústað framtíðar áætlunum okkar, að reyna að þrauka ellina. Þau hafa líka valdið okkur stórtjóni fjárhagslega því ef við stöðvum núna greiðslur, höfum við fyrirgert samningi okkar við lífeyrissjóðinn. Þetta eru kveðjurnar sem þetta skítafyrirtæki er að senda út í samfélagið. OKKUR VERÐUR NAUÐGAÐ ENDALAUST. Það er löngu orðið tímabært að grípa til okkar ráða. Sæl að sinni. 

Handtökur straks!!!!

Sælt veri fólkið. Eins og komið hefur fram, að um 100 milljarðar hafi verið sendir úr landi skömmu fyrir yfirtöku Kaupþings, ber að handtaka straks alla þá sem komu nálægt þessum færslum. Þessir milljarðar eru á reikningum sem erfitt er að komast að hverjir eiga vegna reglna sem gilda í viðkomandi löndum. Farbanni verður að demba á yfirþjófana samstundis. Ef ekki verður gengið straks til verka, er klárlega komið í ljós að ekki gilda sömu lög um Jón og Séra Jón. Nú er tími kominn á að sýna þessari yfirstétt hnefann. Svei mér þá, það er komið blóðbragð í kjaftinn á manni. Ég heimta harðar aðgerðir umsvifalaust. Þeir skulu aldrei sleppa með þessa peninga úr landi. Loka þá inni þar til þeir færa peningana heim. Síðan dæma þá fjandans til. Sæl að sinni.